جميل أن ترى في من تحب.. أجمل ما فيك..

فيك من حلم الطفولة بسمةٍ تجرح شعوري
وفيك من مكر الكبار اللي يحسسني بأمانك


وفيك من تفكيري الرجعي تعصّبْي لْجذوري
وفيك من تفكيري العصري شقاوتك وْلسانك


فيك من بعض اندفاعاتي وإحساسي الذكوري
وفيك من سحر الأنوثة سحر عطفك وامتنانك


فيك طهر النفس يحرجني ويَرجِعني لطوري
وفيك عفة حاج مرضي ربه ..وألله صانك


وفيك من شعري عهد وافي وعصرٍ من عصوري
وفيك مني كل ميزة افتخرت بها عشانك


كلما طالعت صوبك امتلا هالكون جوري
وكلما صديت عنّك تحتويني في جنانك


كل هذا لنّ حبك ما تعدي فوق سوري..
إلا وانت اللي هدمت السور وانته في مكانك


لنّ حبك في حياتي صار محتوم وضروري
مستعدّ أزعل عشانك أهلي وأرضي خوانك


ذا زمانك وانت أول من نحتّه في صخوري
وذا زماني ينتهي عندك وينحاز لزمانك


أنكسر لا قالوا انك سارقٍ مني حضوري
آنا أصلا مالي أي حضور في حضرة كيانك


كلما راهنت عا قلبك يغالطني غروري
واخسر رهاني وقلبي كلما ديّنك دانك


بس هذا ما هو اللي صار لي يا نور نوري
اللي صار اني أحبك تكسب وأخسر رهانك


ننتظر ردودكم